Bu gün (03 fevral) Yasamal rayon Məhkəməsində hakim Tahir İsmayılovun sədrliyi ilə Ağdam rayon İcra Hakimiyyətinin başçısı Həsən Sarıyevin sürücüsü Kamil Axundovun “Gündəlik Bakı” qəzetinə qarşı şərəf və ləyaqətinin müdafiəsi və dəymiş zərərin ödənilməsi (148-ci maddə) tələbi ilə qaldırdığı iddia üzrə məhkəmə hazırlıq iclası keçirilib.
Bu barədə RATİ-yə “Gündəlik Bakı” qəzetinin baş redaktorunun birinci müavini Üzeyir Cəfərov məlumat verdi.
Qeyd edək ki, “Gündəlik Bakı” qəzetində “Ağdam rayon İcra Hakimiyyətinin başçısı Həsən Sraıyev Ağdamda at oynadır?” başlıqlı məqalə dərc olunmuşdu. Bu yazıda Həsən Sarıyevin sürücüsü Kamil Axundovun da adı hallanıb. Bu səbəbdən o qəzetə qarşı iddia qaldırıb.
“Gündəlik Bakı” qəzetinin vəkili vəsatət qaldıraraq Kamil Axundovun yazıdakı materiallara heç bir aidiyyatının olmadığını və bu səbəbdən işin icraata götürülməməyini xahiş etdi”, – deyə qeyd edən Ü. Cəfərovun sözlərinə görə, iddiaçı K. Axundovun prosesdə iştirak etmədiyinə görə hakim iclası qeyri-müəyyən vaxta təxirə salıb.