“Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru, Eynulla Fətullayev vəkili Anar Qasımova jurnalistlə görüşməyə icazə verilməyib. Bu barədə martın 10-da Reportyorların Azadlıq və Təhlükəsizlik İnstitutuna vəkil Anar Qasımov məlumat verib.
“Görüş üçün müraciətdən sonra sənədlərimə baxıb, mənə görüş üçün vaxtın bitdiyini dedilər. Onlara bildirdim ki, saat 16:15-də iş vaxtı bitmir və müəssisənin rəisi Qəhrəman Bağırovla görüşmək istədiyimi dedim. Qəhrəman Bağırov da müəssisə əməkdaşlarının dediklərindən fərqli heç nə demədi və görüşə imkan yaratmadı. Düşünürəm ki, buna səbəb martın 7-də bizim Fətullayevin Bakı İstintaq Təcridxanasından gizli şəkildə köçürülməsi, təzyiqlərə məruz qalması ilə bağlı keçirdiyimiz mətbuat konfransı ilə bağlıdır”, – deyə vəkil bildirib.
Penitensiar Xidmətin ictimaiyyətlə əlaqələr şöbəsinin rəisi Mehman Sadıqov bu gün RATİ-yə açıqlamasında martın 2-də Eynulla Fətullayevin Bakı İstintaq Təcridxanasından 1 saylı Cəzaçəkmə Müəsissəsinə köçürülərkən naməlum şəxslər tərəfindən fiziki təzyiqə məruz qalmasını əsassız adlandırdı və belə bir halın baş vermədiyini bildirdi.
Qeyd edək ki, martın 2-də axşam saat 17.00 radələrində “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru, məhbus jurnalist Eynulla Fətullayev Bakı İstintaq Təcridxanasından 1 saylı Cəzaçəkmə Müəsissəsinə köçürülərkən, naməlum istiqamətə aparılıb. Təxminən 2-3 saat gəzdirildikdən sonra aparıldığı məhbus daşıyan qapalı avtomobil saxlanılıb və avtomobilə hərbi geyimli, maskalı idman cüssəli iki şəxs minib. Onlardan kimliklərini soruşanda isə jurnalisti üzü üstə yerə yıxıblar, hətta biri ayağı ilə Eynullanın boynundan sıxıb və rus dilində həqarətli sözlər deyiblər. Hazırda Eynulla Fətullayev həyatına real təhlükə olduğunu əsas gətirərək, öz xahişi ilə karserdə saxlanılır.
İşgəncələrə Qarşı Azərbaycan Komitəsinin sədri Elçin Behbudov RATİ-yə bildirdi ki, məlum hadisə ilə əlaqədar olaraq, dünən Ədliyyə Nazirliyi Penitensiar Xidmətin rəisi Mədət Quliyevə rəsmi müraciət edərək, Eynulla Fətullayevin təzyiqlə üzləşməsi ilə bağlı məsələnin ətraflı araşdırılmasını xahiş edib.
Xatırladaq ki, Fətullayevə qarşı 2009-cu ilin dekabrın 29-da saxlanıldığı 12 saylı Cəzaçəkmə Müəssisəsində saxta narkotik ittihamı ilə cinayət işi başlanmışdı və 06 iyul 2010-cu il tarixində Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum edilib və hökmün icrası elan edildiyi gündən hesablanır. Bu hökm 29 dekabr 2009-cu ildə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılması ilə bağlı irəli sürülmüş ittiham üzrə çıxarılıb. İş üzrə verilmiş apellyasiya şikayəti təmin olunmayıb.
Habelə Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib.