Dünən (19 noyabr) Nyu-Yorkda yerləşən Jurnalistlərin Müdafiə Komitəsi 2009-cu ilin Söz Azadlığı mükafatlarını təqdim edib. “Gündəlik Azerbaydjan” və “Realniy Azərbaycan” qəzetlərinin həbsdə olan baş redaktoru Eynulla Fətullayev də mükafatçılar arasındadır.
“2005-ci ildə sui-qəsd nəticəsində qətlə yetirilmiş “Monitor” jurnalının baş redaktoru Elmar Hüseynovun iş yoldaşı Fətullayev təhqiqatçı bir jurnalistdir” – deyə JMK-nin Avropa və Mərkəzi Asiya üzrə proqram koordinatoru Nina Oqnianova bildirib. Fətullayev Hüseynovun üstü açılmamış cinayəti ilə bağlı hökumət maneələri barəsində qaldırılmış məsələlərlə əlaqədar məruzələr etdikdən sonra, saxta ittihamlarla səkkiz ildən çox müddətə azadlıqdan məhrum edilib. “Onun yeganə cinayəti jurnalist olmasıdır. Eynulla hökumətin yerinə yetirmədiyi bir işi elədiyinə görə cəzalanır. Yəni redaktorunun qatilini axtarır.”
Qeyd edək ki, Jurnalistləri Müdafiə Komitəsi təhlükəli və repressiya şəraitində çalışan cəsarətli jurnalistlərə hər il mükafatlar verir.
Xatırladaq ki, Eynulla Fətullayev 2007-ci ilin aprelin 21-də böhtan və təhqirdə ittiham olunaraq 2 il 6 ay müddətində azadlıqdan məhrum edilib. Sonradan baş redaktor terrorla hədələmə, etnik və dini düşmənçiliyin salınması, vergidən yayınma ittihamları ilə təqsirli bilinib və 2007-ci il oktyabrın 30-da əvvəlki həbs müddəti də daxil olmaqla ümumilikdə, 8 il 6 ay müddətinə azadlıqdan məhrumetmə cəzası verilib.