Bu gün (03 fevral) Emin Fətullayev 12 saylı cəzaçəkmə müəssisəsində cəza çəkən oğlu "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevlə görüşüb. Bu barədə RATİ-yə jurnalistin atası Emin Fətullayevin özü məlumat verdi: “Eynulla Fətullayevin dünyada müdafiə kompaniyası hələ də davam edir .
Bir çox ölkələrin vətəndaşları Eynulla Fətullayevə məktub və yüzlərlə açıqcalar göndəriblər. Məktub və açıqcalar Kanadadan, İngiltərədən, İrlandiyadan, İsveçrədən, İtaliyadan, Cənubi Afrika Respublikasından, İrlandiyadan, ABŞ-dan və digər ölkələrdən gəlir. Məktub və açıqca müəllifləri Eynullaya cəsarətinə və mərdliyinə görə öz minnətdarlıqlarını bildirirlər. Böyük Britaniyanın Mətbuat Şurasının sədri Barbara Stoulden də Eynullaya məktub yazaraq onunla həmrəy olduğunu bildirib”.
Xatırladaq ki, E. Fətullayev 2007-ci il aprelin 21-də böhtan və təhqirdə ittiham olunaraq 2 il 6 ay müddətinə azadlıqdan məhrum edilib. Sonradan terrorla hədələmə, etnik və dini düşmənçiliyin salınması, vergidən yayınma ittihamları ilə təqsirli bilinib və 2007-ci il oktyabrın 30-da ona əvvəlki həbs müddəti də daxil olmaqla ümumilikdə 8 il 6 ay müddətinə azadlıqdan məhrumetmə cəzası verilib.