Gəncədə yayımlanan “Kəpəz” televiziya kanalının təsisçisi Rüfət Əsgərovun atası Razim İsmail oğlu Əsgərov bu gün (11 iyun) Reportyorların Azadlıq və Təhlükəsizlik İnstitutuna zəng vuraraq RATİ-nin “Kəpəz” TV ilə bağlı dünən yaymış məlumatına öz münasibətini bildirdi.
. Razim Əsgərov “Kəpəz” TV-nin hökumət nümayəndələrinin təzyiqi ilə onun oğlu Rüfət Əsgərovdan alınması barədə yayılan xəbəri təkzib etdi. O, bildirdi ki, şirkəti şəxsən özü oğlu Rüfət tərəfindən ona verilən baş (müddətsiz) etibarnamə əsasında satıb. Razim Əsgərov qeyd etdi ki, alğı-satqı əməliyyatı iyunun 4-də baş verib və o notarius tərəfindən qeydə alınıb. “Kəpəz” TV-nin hansı məbləğə və kimə satdığını açıqlamayan Razim Əsgərov pulu öz bank hesabına köçürülmə yolu ilə aldığını bildirdi.
Oğlunun xaricdən kiməsə zəng etdiyini və televiziya şirkətinin əlindən alındığı barədə söylənənlərə gəldikdə isə Razim Əsgərov aşağıdakıları bildirdi: “Mənim oğlum xaricə gedəndən sonra 4 nəfər ailə üzvümüzdən başqa heç kəs ilə əlaqə saxlamır. O, hər gün bir neçə dəfə mənimlə telefon əlaqəsi saxlayır. Dünən və bu gün də əlaqə saxlayıb. Mən onun kiməsə zəng edib şikayətlənməsindən maraqlandım. Oğlum Rüfət mənə dedi ki, ailə üzvlərindən başqa heç kəsə zəng vurmayıb və şirkətin əlindən alınmasını deməyib. Oğlum onun adından yayılan məlumatları yalan adlandırdı”.
Oğlunun nə vaxt və nəyə görə xaricə getdiyini alğı-satqı zamanı Bakıda olub olmadığını və hal-hazırda oğlu ilə necə əlaqə yaratmağın mümkünlüyünü açıqlamayan Razim Əsgərov sonda qətiyyətlə bildirdi ki, nə onun oğluna nə də onların ailəsinə heç kəs heç bir zaman təzyiq göstərməyib və göstərə də bilməz.
Qeyd edək məsələ ilə bağlı “Kəpəz” TV-nin yeni rəhbəri Fuad Cabbarov “Kəpəz” TV-nin təzyiq nəticəsində alınmasını cəfəngiyat adlandırmışdı. O telekanalı könüllü alğı-satqı müqaviləsi əsasında R. Əsgərovdan aldıqlarını vurğulayaraq RATİ-nin əməkdaşına “Siz bu məsələni qabartmayın, çünki bu məsələni qabardanlar sonradan peşman olacaqlar” məsləhətini də vermişdi.