Milli Məclis “Əcnəbilərin və vətəndaşlığı olmayan şəxslərin hüquqi vəziyyəti haqqında” Qanuna əlavələr və dəyişikliklər edib. Dəyişikliyə görə, Azərbaycanda daimi yaşayan əcnəbilər və vətəndaşlığı olmayan şəxslər də qeyri-hökumət təşkilatı (QHT) yarada biləcəklər.
Dəyişikliklərdə deyilir ki, ölkədə daimi yaşamaq hüququ olan əcnəbilər və vətəndaşlığı olmayan şəxslər Azərbaycan ərazisində qeyri-hökumət təşkilatının təsisçisi ola bilərlər.
“AzərTAc” informasiya agentliyinin məlumatında o da bildirilir ki, bununla əlaqədar Azərbaycan Mülki Məcəlləsinə də müvafiq əlavələr və dəyişikliklər edilib. Dəyişikliklərdə bildirilir ki, qeyri-hökumət təşkilatlarının nizamnamələrində dövlət və yerli özünüidarə orqanlarının səlahiyyətlərinin mənimsənilməsinə, habelə dövlət nəzarəti və yoxlama funksiyalarının nəzərdə tutulmasına yol verilmir. QHT-lərin adlarında dövlət orqanlarının, habelə Azərbaycanın görkəmli şəxsiyyətlərinin adlarından istifadə edilə bilməz.