BƏXTİYAR HACIYEVƏ QARŞI FƏRARİLİK MADDƏSİ İLƏ CİNAYƏT İŞİ AÇILIB

  Yanvarın 25-də RATİ-nin mətbuat mərkəzində  deputatlığa keçmiş namizəd, gənc fəal Bəxtiyar Hacıyevin  bir gün əvvəl həbs olunmasına dair  tərəfdaşları tərəfindən mətbuat konfransı keçirildi. Rail Abbasov bildirdi ki, Bəxtiyar Hacıyevi Gürcüstana getmək istəyərkən sərhədə tutublar və o, Gəncə şəhərində saxlanılır.

  “Bəxtiyar Hacıyev yanvarın 24-də Gəncə şəhər prokuroru Adil Vəliyevə izahat verib. Adil Vəliyev ona bildirib ki, sənə qarşı cinayət işi açılacaq. Daha sonra Bəxtiyar Hacıyevi Gəncə şəhər Hərbi Komissarlığına aparıblar və  sonra da onu sərbəst buraxıblar. Bundan sonra Bəxtiyar Hacıyev Gürcüstana keçmək istəyəndə onu  təkrar saxlayıblar  və ona qarşı Cinayət Məcəlləsinin  334-cü (fərarilik)  maddəsi ilə cinayət işi açılıb. İstintaq başa çatana qədər müstəntiq onun  Gəncə şəhərindən çıxmasına icazə vermir. Bəxtiyar Hacıyev keçən dəfə qanunsuz saxlanılması ilə bağlı məhkəməyə müraciət edib və  yanvarın 31-də Səbail rayon Məhkəməsində onun  işinə baxılacaq. Lakin Bəxtiyara bu məhkəmədə iştirak etməyə belə icazə vermirlər”, – deyə bildirən Bəxtiyar Haciyevin  nümayəndəsi Nərmin Rəhimli onun siyasi fəaliyyəti ilə bağlı saxlanıldığını bildirdi.

“Bəxtiyarın təhsil alması ilə  bağlı möhlət hüququ var və  o bu hüquqdan istifadə etmək istəyir”, – deyə o bildirib.

            Hüquq müdafiəçisi Vidadi İsgəndərov bildirdi ki, möhlət hüququ varsa, onu əsgərliyə aparmağın özü qanunsuzluqdur.

            Dalğa Gənclər Hərəkatının həmtəsisçisi Ramin Hacılı, AXCP Gənclər Komitəsinin sədri Əbülfəz Qurbanlı da  Haciyevin siyasi sifarişlə saxlanıldığını bildirdilər.

Xatırladaq  ki, 2010-cu ilin noyabrında keçirilmiş parlament seçkisində 17 saylı Yasamal üçüncü seçki dairəsindən deputatlığa namizəd olmuş Bəxtiyar Hacıyev seçkidən bir neçə gün sonra, noyabrın 17-də təhsil üçün Gürcüstana getmək istəyərkən Qazax rayonunun Qırmızı Körpü sərhəd-keçid məntəqəsində saxlanmışdı. O zaman Konstitusiya Məhkəməsi seçkinin nəticələrini hələlik təsdiq etmədiyindən deputatlığa namizəd statusunda olan Bəxtiyar Hacıyev bir gün sonra azad edilmişdi.