Yanvarın 25-i axşam saatlarında deputatlığa keçmiş namizəd, gənc fəal Bəxtiyar Hacıyevi sərbəst buraxıblar. Lakin yanvarın 26-sı onu yenidən Gəncə şəhər Prokurorluğuna çağırıblar. Bu barədə RATİ-yə Bəxtiyar Hacıyevin nümayəndəsi Rail Abbasov məlumat verib.
“Bəxtiyar Hacıyevi bu gün ifadə vermək üçün Gəncə şəhər Prokurorluğuna çağırıblar. İfadə verdikdən sonra Gəncə şəhərini tərk etməmək şərti ilə onu azadlığa buraxıblar. Bəxtiyar Hacıyev Bakıya gəlmək istədiyini, burda çoxlu işlərinin, ən əsası isə məhkəmə prosesi olduğunu bildirdikdən sonra ona deyiblər ki, Gəncə şəhər prokuroruna müraciət yaz və bu müraciətə müsbət cavab verildikdən sonra Gəncəni tərk edə bilərsən” – deyə Abbasov qeyd edib.
Xatırladaq ki, 2010-cu ilin noyabrında keçirilmiş parlament seçkisində 17 saylı Yasamal üçüncü seçki dairəsindən deputatlığa namizəd olmuş Bəxtiyar Hacıyev seçkidən bir neçə gün sonra, noyabrın 17-də təhsil üçün Gürcüstana getmək istəyərkən Qazax rayonunun Qırmızı Körpü sərhəd-keçid məntəqəsində saxlanmışdı. O zaman Konstitusiya Məhkəməsi seçkinin nəticələrini hələlik təsdiq etmədiyindən deputatlığa namizəd statusunda olan Bəxtiyar Hacıyev bir gün sonra azad edilmişdi. Hazırda isə ona qarşı Cinayət Məcəlləsinin 321-cü (hərbi xidmətdən boyun qaçırma) maddəsi ilə cinayət işi açılıb. İstintaq başa çatana qədər müstəntiq onun Gəncə şəhərindən çıxmasına icazə vermir.