Vaxtı ilə “Azadlıq” qəzetinin redaksiyasına məxsus olmuş Xəqani küçəsi 33 ünvanındakı sökülmüş iki mərtəbəli binanın yerində Hesablama Palatasının 4 mərtəbəli inzibati binası ucaldılır.
Sökülmüş binanın qarşısındakı lövhədə yeni inşa ediləcək binanın layihəsi əks olunur.
Xatırladaq ki, sökülmüş bina 1992-ci ildən “Azadlıq” qəzetinə məxsus olub. 2006-cı ilin noyabrınadək “Azadlıq” qəzeti ilə yanaşı Xəqani küçəsi 33-də Azərbaycan Xalq Cəbhəsi Partiyası, “Bizim yol” qəzeti, “Turan” İnformasiya Agentliyi, “Yeni nəsil” Jurnalistlər Birliyi, Reportyorların Azadlıq və Təhlükəsizlik İnstitutu yerləşirdi. Bütün bu qurumlar İqtisad Məhkəməsinin 2006-cı ilin noyabrın 24-də hökumətin siyasi sifarişinə uyğun verilmiş məhkəmə qərarına əsasən elə həmin gün zorla binadan çıxarılmışdılar. Məhkəmə qərarına əsasən Xəqani 33 ünvanında yerləşən bina Müəllimlərin Təkmilləşdirmə İnstitutuna verilib və Təhsil Nazirliyinin balansına keçirilmişdi. Lakin bir neçə ay sonra Nazirlər Kabinetinin qərarına əsasən bina Təhsil Nazirliyindən alınaraq Hesablama Palatasının balansına verilmişdir.