“İCTİMAİ TELEVİZİYA”DA REFERENDUMLA BAĞLI MÜZAKİRƏLƏR ÜÇÜN PULSUZ EFİR VAXTI AYRILACAQ

yanvar 7th, 2009
Müsavat Partiyası 2009-cu il martın 18-nə təyin olunmuş referendumla  bağlı əlavə efir vaxtının ayrılması üçün İctimai Televiziya və Radio Şurası rəhbərliyinə müraciət edib.

Bu barədə RATİ-yə Müsavat Partiyasının Mərkəzi İcra Aparatının  Sədri Arif Hacılı məlumat verib: ”Bizim martın 18-də keçiriləcək referendumla bağlı alternativ fikri ictimaiyyətə çatdırmağımız üçün əlavə efir vaxtına ehtiyacımız  var”.
İTV-nin ictimaiyyətlə əlaqələr şöbəsinin sədri Tahir Məmmədov ərizə ilə artıq tanış olduqlarını bildirdi: ”Referendumla bağlı geniş müzakirələrin təşkil olunacağı vaxtda Müsavat Partiyası da digər  partiyalar kimi müzakirələrdə iştirak edə bilər. Ancaq  Müsavat Partiyasına əlavə efir vaxtı verilərsə, digər partiyalar da bu cür əlavə vaxt istəyəcəklər. Bu isə mümkünsüzdür,  həm də bu ictimai yayım prinsiplərinə ziddir”.
“Referendumun səsvermə gününə 28 gün qalmış başlayacaq və qeydiyyatdan keçmiş bütün təşkilatlar referendumla bağlı müzakirələrdə iştirak etmək hüququna malik olacaqlar”.  Bu sözləri  isə Mərkəzi Seçki Komissiyasının (MSK) ictimaiyyətlə əlaqələr şöbəsinin sədri Azər Sarıyev dedi.  O referendumla bağlı teleradio məkanında müzakirələr üçün neçə saatın ayrılacağını bəri başdan söyləyə bilməsə də, müzakirəyə qatılacaq bütün tərəflərə eyni imkanın  yaradılacağını qeyd etdi.
Qeyd edək ki,  Seçki Məcəlləsinə görə, referendumla bağlı müzakirələrə ancaq İctimai Televiziyada ( İTV) pulsuz efir vaxtı ayrılacaq.
Xatırladaq ki, martın 18-nə təyin olunmuş referendumda Azərbaycan Respublikası Konstitusiyasının 29 maddəsinə əlavə və dəyişikliklər təklif edilir. Bu təkliflər sırasında eyni şəxsin fasiləsiz olaraq 2 dəfədən artıq prezident seçilməsinə qoyulmuş qadağanın ləğv edilməsi də öz əksini tapıb.