Bu gün (12 noyabr) Mirzə Sakit (Zahidov) 17 saylı cəzaçəkmə müəssisəsində cəza çəkən qardaşı “Azadlıq” qəzetinin baş redaktoru Qənimət Zahidlə (Zahidov) görüşüb.
M.Sakit görüş zamanı “Azadlıq” qəzetindən uzaqlaşdırılması və bununla əlaqədar olan bir sıra məsələlər barədə baş redaktorla qarşılıqlı anlaşmaya gəldiyini bildirdi. O həmçinin bildirdi ki, gələn həftənin ikinci günündən etibarən onun qəzetdə fəaliyyəti bərpa olunacaq.
Qeyd edək ki, bir müddət öncə Mirzə Sakitin şeirlərinin “Azadlıq” qəzetində dərc olunmaması ilə bağlı yaranmış problemlə əlaqədar Mirzə Sakit “Azadlıq” qəzetindən uzaqlaşdırılmışdı.
Xatırladaq ki, hazırda 17 saylı cəzaçəkmə müəssisəsində cəza çəkən Qənimət Zahid (Zahidov) CM-nin 127.2.3 (xuliqanlıq niyyəti ilə qəsdən sağlamlığa az zərər vurma) ittiham olunaraq 3 il 6 ay, CM-in 221-ci maddəsi ilə ittiham edilməklə isə 6 ay olmaqla ümumilikdə 4 il müddətinə azadlıqdan məhrum edilib.