Martın 8-də Ayəndə Mürsəliyeva Penitensiar Xidmətin Müalicə Müəssisəsində həyat yoldaşı, “Azadlıq” qəzetinin həbsdə olan baş redaktoru Qənimət Zahidlə görüşüb. Bu barədə Reportyorların Azadlıq və Təhlükəsizlik İnstitutuna (RATİ) A.Mürsəliyeva məlumat verib.
Onun bildirdiyinə görə, baş redaktor saxlanma şəraitindən heç bir şikayəti olmadığını desə də, revmatizm ağrılarının hələ də qalmaqda olduğunu və müalicəsini davam etdirdiyini bildirib.“AŞ-nın insan hüquqları üzrə komissarı Tomas Hammerberq ötən həftə ölkəmizə səfəri çərçivəsində Qənimət Zahidlə görüşüb və onunla Azərbaycanda söz azadlığı və insan haqları sahəsindəki problemlərdən danışıblar” – deyə A.Mürsəliyeva qeyd edib.
Xatırladaq ki, Qənimət Zahid ( Zahidov) CM- nin 127.2.3 ( xuliqanlıq niyyəti ilə qəsdən sağlamlığa az zərər vurma ) maddəsi ilə ittiham olunaraq 3 il 6 ay, CM-nin 221-ci maddəsi ilə ittiham edilməklə isə 6 ay olmaqla ümumilikdə, 4 il müddətində azadlıqdan məhrum edilib.
“Azadlıq” qəzeti 1989-cu ildən çıxır və gündəlik qəzet kimi fəaliyyət göstərir.