HƏYAT YOLDAŞI QƏNİMƏT ZAHİDLƏ GÖRÜŞÜB

iyun 9th, 2009
Dünən (8 iyun) Ayəndə Mürsəliyeva həyat yoldaşı, 17 saylı cəzaçəkmə müəssisəsində cəza çəkən “Azadlıq” qəzetinin baş redaktoru Qənimət Zahidlə (Zahidov) görüşüb.

Bu barədə Reportyorların Azadlıq və Təhlükəsizlik İnstitutuna (RATİ) Ayəndə Mürsəliyevanın özü məlumat verib. Baş redaktorun səhhətinin normal olduğunu, saxlanma şəraitindən şikayət etmədiyini deyən A.Mürsəliyeva, görüşdə söhbətin mövzusunun  əsasən jurnalistlərin Norveç səfəri  ilə bağlı olduğunu bildirdi. A.Mürsəliyeva Norveçdə “Söz azadlığı” fondunun dəstəyi ilə təsis olunmuş mükafatın “Azadlıq” qəzetinə də təqdim olunması barədə təəssüratlarını baş redaktorla bölüşdüyünü və baş redaktorun mükafatlanmaya görə sevinc hissləri keçirdiyini deyib.
Xatırladaq ki, Qənimət Zahid (Zahidov) CM-nin 127.2.3 (xuliqanlıq niyyəti ilə qəsdən sağlamlığa az zərər vurma) ilə ittiham olunaraq 3il 6 ay, CM-nin 221-ci maddəsi ilə ittiham edilməklə isə 6 ay olmaqla ümumiyyətlə, 4 il müddətinə azadlıqdan məhrum edilib.