“Azadlıq” qəzetinin həbs edilmiş baş redaktoru Qənimət Zahidov bu gündən etibarən aclıq aksiyasına başlayıb.
Bu barədə RATİ-yə jurnalistin vəkili Osman Kazımov məlumat verib. Vəkilin sözlərinə görə, o dünən 1 saylı Bayıl İstintaq Təcridxanasında saxlanılan Zahidovla görüşüb və söhbət zamanı jurnalist bu gündən (01 aprel) aclığa başlayacağını deyib : “Qənimət aclıq aksiyasını həmkarlarının keçirdiyi aclıq aksiyasına dəstək məqsədilə keçirir. Və tələbləri də jurnalist həmkarlarının tələbləri ilə eynidir”.
Məsələni dəqiqləşdirmək üçün Penitensiar Xidmətin İctimaiyyətlə Əlaqələr şöbəsi ilə əlaqə saxladıq. Şöbədən bildirdilər ki, “bu məlumat yanlışdır, belə bir şey yoxdur”.
Daha sonra 1 saylı Bayıl İstintaq Təcridxanası ilə əlaqə saxlasaq da, ümumi şöbədən onlarda heç bir məlumatın olmadığını bildirdilər.