Bu gün (20 iyul) bir qrup jurnalist Prezident Administrasiyasının mühafizə xidmətinin əməkdaşları tərəfindən təzyiqə məruz qalıblar və mühafizəçilər onlara qanuni peşə fəaliyyətini yerinə yetirməyə mane olublar.
Belə ki, “Kür” çayının daşması nəticəsində zərər çəkmiş Sabirabad rayonunun bir qrup sakininin Prezident Administrasiyasının qarşısında keçirmək istədiyi aksiyada video və foto çəkiliş aparan Reportyorların Azadlıq və Təhlükəsizlik İnstitutunun (RATİ) və “Turan” informasiya agentliklərinin əməkdaşları Cavid Qurbanov, Mehman Hüseynov, “Azadlıq” Radiosunun əməkdaşı Abbas Atilay və “Bizim yol” qəzetinin əməkdaşı Hacı Zeynalov Prezident Administrasiyasının mühafizə xidmətinin əməkdaşları tərəfindən saxlanılaraq, administrasiyanın inzibati binasına aparılıblar. Orada jurnalistlərə bildiriblər ki, Prezident Administrasiyasının binasını çəkməyə icazə verilmir. Media nümayəndələrinin çəkiliş avadanlıqları yoxlanılıb və prezident administrasiyasının binasının görüntüsü olan bütün kadrlar silinib. Jurnalistlərə bir daha Administrasiyanın binasını çəkməməklə bağlı xəbərdarlıq olunub.
Video: http://www.youtube.com/watch?v=XGYIypebt6I