Bu gün (16 iyul) Azərbaycan Media Mərkəzində Jurnalist Ekspert Mərkəzinin (JEM) bir qrup jurnalist heyətinin və ictimaiyyət nümayəndələrinin Dağlıq Qarabağa səfərinin təşkil edilməsi və ictimaiyyətin buna münasibəti mövzusu ətrafında dəyirmi masa keçirilib.
Tədbirdə giriş sözü ilə çıxış edən JEM-in rəhbəri Ceyhun Musaoğlu Dağlıq Qarabağda yaşayan, milliyətcə erməni olan Azərbaycan vətəndaşlarının Azərbaycan dövlətinin diqqətindən kənarda qalmaması və azərbaycanlılarla ermənilərin birgə yaşamasının mümkün olmadığına dair separatçı fikirlərin əsassız olması gerçəkliyini bütün dünyaya nümayiş etdirmək məqsədində olduqlarını bildirdi. Ermənistan-Azərbaycan Dağlıq Qarabağ münaqişəsinin nizamlanması istiqamətində son günlər həm siyasi müstəvidə, həm də xalq diplomatiyası istiqamətində xüsusi fəallığın müşahidə olunduğunu deyən C.Musaoğlu məqsədin şəffaf informasiya əldə etmək olduğunu bir daha xatırladaraq, bu xüsusda ölkə başçısı İlham Əliyevə və Xarici İşlər naziri Elmar Məmmədyarova xüsusi müraciət ünvanlandığını bildirdi.