Gündəlik nəşr olunan “Gün-səhər” qəzeti maliyyə problemlərinə görə iyunun 1-dən fəaliyyətini müvəqqəti olaraq dayandırmağa məcbur olub.
Bu barədə RATI-yə qəzetin baş redaktoru Qabil Abbasoğlu məlumat verib:
“Ölkədə gedən sürətli bahalaşma, qəzetin fəaliyyətini iflic vəziyyətinə salıb. Yanvar ayından indiyə qədər kağız 150 manat bahalaşıb. (Hazırda qəzetin bir tonu 750 manatdır – red.) İyunun 1-dən Azərbaycan Nəşriyyatı kommunal xərcləri 25 faiz artırdı. Arxasınca çap xərcinin də artacağı gözlənir”, – deyə qeyd edən Qabil Abbasoğlu onu da dedi ki, bu addım heç də qəzetin nəşrinin tam dayandırılması deyil. Maliyyə imkanları bir daha araşdırılacaq və qəzetin fəaliyyəti yenidən bərpa ediləcək.
Qeyd edək ki, “Gün-səhər” gündəlik ictimai-siyasi qəzet kimi 2005-ci ilin yanvarından nəşr olunur. Ötən il də qəzetdə maliyyə problemləri yaşandı və buna görə “Gün-səhər” bir neçə ay həftədə bir dəfə nəşr olundu.
Qeyd edək ki, “Gün-səhər” qəzetinin əlavəsi kimi “İnternyus-Azərbaycan” və Yeni Nəsil Jurnalistlər Birliyinin layihəsi olan ABŞ Dövlət Departamenti və “İnternyus Netvork” təşkilatı tərəfindən dəstəklənən “İslam və müasir cəmiyyət” buraxılışı da dərc edilirdi. Q. Abbasoğlunun sözlərinə görə, əgər “Gün-səhər” qəzeti ayda iki dəfə dərc olunan “İslam və müasir cəmiyyət” buraxılışının növbəti sayı hazır olana qədər nəşrini bərpa etməsə bu halda layihə başqa bir qəzetin nəzdində həyata keçiriləcək.