Bu gün (02 noyabr) Qubadlı rayon Məhkəməsində hakim Etibar Quliyevin sədrliyi ilə Abşeron rayon Ceyranbatan qəsəbəsinin bir qrup sakininin Cinayət Məcəlləsinin 127-ci (qəsdən sağlamlığa az ağır zərər vurma) və 221-ci (xuliqanlıq) maddələri ilə “Güzgü” qəzetinin müxbiri Kamran Bəyəliyevə (Kamran Səxavət) qarşı irəli sürdükləri ittiham üzrə məhkəmə prosesi müxbirə 1 il müddətinə islah işləri cəzası hökmü oxunmaqla başa çatıb. Bu barədə RATİ-yə K.Bəyəliyevin vəkili Vüqar Xasayev məlumat verib.
Vəkilin sözlərinə görə, məhkəmə kobud qanun pozuntuları ilə keçirilib və hakim işi qərəzli aparıb və ədalətsiz hökm çıxarıb. Bu səbəbdən də Qubadlı rayon Məhkəməsinin hökmündən Apellaysiya Məhkəməsinə apellayasiya şikayəti veriləcək.
Xatırladaq ki, 2009-cu il sentyabr ayının 11-də axşam saat 11 radələrində “Güzgü” qəzetinin müxbiri Kamran Bəyəliyev ilə Ceyranbatan qəsəbəsinin girişində Bakı-Sumqayıt magistral yolun üstündə Sabir Qafarova məxsus kafeni icarəyə götürmüş İdris Zeynalov və İmran Novruzov arasında mübahisə yaranıb. Mübahisə icarədarların K.Bəyəliyevdən işlətdikləri kafe barədə yazıları dayandırmağı tələb etmələri ilə başlanıb. Baş verən hadisə ilə bağlı K.Bəyəliyev haqqında məhkəməyə şikayət edilib.
K.Bəyəliyev həmin kafenin əxlaqsızlıq yuvası kimi fəaliyyət göstərdiyini iddia edirmiş.
“Güzgü” qəzeti 1992-ci il iyul ayının 22-dən ayda 1 və ya 2 dəfə çap olunan iqtidaryönlü satirik nəşrdir.