Bu gün (17 sentyabr) Nərimanov rayon Məhkəməsində hakim Turqay Hüseynovun sədrliyi ilə Dağ Yəhudiləri İcmasının rəhbəri Semyon İxiilov və digərlərinin “Xural” qəzetinin baş redaktoru Əvəz Zeynallıya qarşı qaldırdığı iddia üzrə məhkəmə prosesi davam edib.
Xatırladaq ki, baş redaktor haqqında Cinayət Məcəlləsinin 283-cü maddəsi ilə (irqi, dini, milli ayrı-seçkilik salmaq) cinayət işi açılıb. Bu iddiaya səbəb isə Adolf Hitlerin "Mənim savaşım" kitabının Zeynallı tərəfindən Azərbaycan dilinə tərcümə olunması və kitabdan parçaların "Xural" qəzetində dərc olunması olub.
Qeyd edək ki, təxminən 10 ay bundan əvvəl başlamış məhkəmə prosesi Zeynallının “Mənim Savaşım” kitabını ekspertizaya göndərməklə bağlı qaldırdığı vəsatət əsasında təxirə salınmışdı. Zeynallının RATİ-yə verdiyi məlumata görə, bu 10 ay ərzində kitabın ekspertizası aparılmayıb.
Prosesdə Zeynallı kitabın ekspertizaya göndərilməsi ilə bağlı yenidən vəsatət qaldırıb. Hakim Hüseynov vəsatəti baxılmamış saxlayıb və bildirib ki, proses zamanı ehtiyacın yaranacağı təqdirdə kitab ekspertizaya göndəriləcək.
Proses sentyabrın 23-də saat 15.00-da şahid ifadələri ilə davam edəcək.