Bu gün (10 sentyabr) Yasamal rayon Məhkəməsində hakim Elçin Qurbanovun sədrliyi ilə millət vəkili Bəxtiyar Əliyevin Baş Dövlət Yol Polis İdarəsi (BDYPİ) və Azərbaycan Dövlət Teleradio Şirkətinə qarşı (AzTV) qaldırdığı iddia əsasında növbəti məhkəmə prosesi keçirildi.
Prosesdə iddiaçının vəkili Altay Muradov, cavabdeh Ramazan Mütəllibovun vəkili Ədalət Sadıqov, Yol Polis İdarəsinin nümayəndəsi Faiq Əliyev və AzTV-nin nümayəndəsi Sədrəddin İsgəndərov iştirak edirdi.
Ramazan Mütəllibov məhkəmə pridmetinə çevrilmiş AzTV-də nümayiş etdirilən görüntülərlə bağlı şərhin verilməsi tapşırığının ona rəhbərlik tərəfindən verildiyini qeyd etdi. Görüntülərin isə yol hərəkatı qaydasını nizamlamaq üçün BDYPİ-nin Bakı şəhərində yaratmış olduğu vahid idarəetmə sistemindən qəbul edildiyini bildirdi.
AzTv-nin nümayəndəsi İsgəndərov isə bildirdi ki, Dövlət Teleradio Şirkəti bu proqramı BDYPİ-nin qərarı ilə yayımlayır.
Hakim Qurbanov tərəfləri dinlədikdən sonra növbəti prosesi sentyabrın 11-i saat 10:00 təyin etdi.
Qeyd edək ki, yol polisi AzTv-də mütəmadi olaraq Bakı şəhərində yol hərəkatı qaydasının pozulmasına dair Ramazan Mütəllibovun şərhi ilə süjetlər nümayiş etdirir. Belə süjetlərin birində millət vəkili Əliyevin avtomobili də nümayiş olunub və millət vəkili bu addımı şəxsiyyətinin alçaldılması və təhqir edilməsi kimi dəyərləndirərək məhkəməyə müraciət edib.
Yeri gəlmişkən onu da qeyd edək ki, bir neçə gün bundan əvvəl Əliyev AzTV-ni məhkəməyə vermədiyini demişdi. Amma bu gün proses zamanı məlum oldu ki, AzTV-nin də adı cavabdehlər sırasındadır.