Bu gün (15 mart) Səbayel Rayon Məhkəməsində hakim Elnur Həsənovun sədrliyi ilə Nərgiz Cabbarlının “Azərbaycan televiziya və Radio Verilişləri” Qapalı Səhmdar Cəmiyyətinə (AzTV) qarşı qaldırdığı iddiaya əsasən məhkəmə prosesi keçirilib. Prosesdə N. Cabbarlının nümayəndəsi Bayram Rəsulov, qarşı tərəfdən isə AzTV-nin nümayəndəsi Sədrəddin İsgəndərov iştirak edirdilər.
Bu günkü prosesdə isə iddiaçı N. Cabbarlı nümayəndəsi B. Rəsulov məhkəməyə iddia tələbinin artırılması xahişi barədə ərizə təqdim etdi. N.Cabbarlı ərizədə məhkəmədən ilkin iddiasına əlavə olaraq AZ TV ilə 5 il müddətinə əmək müqaviləsinin bağlanması, Nazirlər Kabinetinin 18 iyun 2008-ci il tarixli 106 saylı qərarına hüquqi qiymətin verilməsi, AZ TV-də işçilərin əməkhaqqının işəmuzd qaydada ödənilməsinin qanunsuz hesab edərək ləğv edilməsi və vurulan mənəvi zərərə görə cavabdehdən 50.000 (əlli min) AZN tutularaq ona ödənilməsi barədə qətnamənin çıxarılmasını xahiş etmişdir.
Bunda əlavə iddiaçı tərəf prosesə Dövlət Sosial Müdafiə Komitəsinin (DSMK) də cəlb edilməsi barədə vəsatətlə çıxış etdilər. Hakim E. Həsənov vəsatəti təmin etdi və DSMK-nin nümayəndəsinin prosesə cəlb edilməsi üçün, prosesi 6 aprel saat 15:00 tarixinə qədər təxirə saldı.