İlk olaraq, Hacı Zeynalov iddia ərizəsi ilə yaxından tanış olduğunu məhkəməyə bildirdi. Daha sonra Xalid Bağırovun vəkilləri xüsusi ittiham qaydasında şikayət verən şəxsin özünün prosesdə iştirak etməsinin vacib olduğunu bildirdilər. Vəkillər həmçinin xüsusi ittihamçının vəkilinin qanunla müəyyən edilmiş sənədi olan etibarnamənin mövcud olmadığını və onun səlahiyyəti təsdiq edilənə qədər vəkilin məhkəmə prosesindən kənarlaşdırılmasını hakimdən xahiş etdilər və eləcə də işin icraata qəbul edilməsindən imtina edilməsi barədə vəsatət qaldırdılar.
Hakim E. Qurbanov vəsatətin müzakirəsi ilə əlaqədar olaraq, prosesi 15 aprel saat 15:30-a təyin etdi.
Xatırladaq ki, Bakı şəhər Baş Polis İdarəsinin rəisi, polis general-mayoru Rafiq Abbasov “Bizim Yol” qəzetinin 01 mart 2011-ci il tarixli 38 (1614)-ci nömrəsinin 5-ci səhifəsində müəllif Hacı Zeynalovun imzası ilə “Tutulanlara vəkil yox, zopa lazımdır” başlıqlı, eləcə də “Vəkil Xalid Bağırov bu şüarla aksiyalar keçirilməsini təklif edir” sərlövhəli yazısında bir müddət əvvəl Nizami rayonu Polis İdarəsinin 25-ci polis bölməsində şübhəli şəxs qismində saxlanılan Elvin Əsgərovun döyülərək öldürülməsi barədə sərt ittihamlar irəli sürülməsini əsas gətirərək, yazılanları böhtan xarakterli ifadələr adlandırmış və “Bizim Yol” qəzetinin əməkdaşı Hacı Zeynalov və vəkil Xalid Bağırov barəsində CM-nin 147.2-ci maddəsi ilə cinayət məsuliyyətinə cəlb edilməsi tələbi ilə məhkəməyə müraciət etmişdir.
* 147.2. Ağır və ya xüsusilə ağır cinayətdə ittiham etməklə böhtan atma—
iki ilədək müddətə islah işləri və ya iki ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır