Norveçdə yerləşən, insan haqları ilə məşğul olan “Human Rayts Haus” Təşkilatı (HRHT) “Azadlıq” və “Amerikanın səsi” radiolarının yayımının Azərbaycanda milli tezliklərdə davam etdirilməsi üçün prezident İlham Əliyevə məktub ünvanlayıb.
Məktubda HRHT və imza atan digər 24 təşkilat MTRŞ sədri Nuşirəvan Məhərrəmlinin “Azadlıq,” BBC və “Amerikanın səsi” radiolarının milli tezliklərdə yayımının 1 yanvar 2009-cu il tarixdən etibarən dayandırılacağı barədə verdiyi bəyanatdan narahat olduqlarını bildiriblər.
Məktubda bildirilir: “Biz inanırıq ki, bu üç beynəlxalq yayımçı obyektiv informasiya verməklə və sosial, iqtisadi, siyasi mövzularda canlı dəyirmi masalar təşkil etməklə Azərbaycanda ictimai debatlara nəzərə çarpan töhfələrini verirlər. Bu üç radiostansiyanın yayımını dayandırmaq onsuz da müxtəliflik baxımından çatışmazlıqla xarakterizə olunan Azərbaycanın media məkanını daha da zəiflədər.”
Məktubda imza atanlar MTRŞ-ni öz qərarını bir daha nəzərdən keçirməyə və “Azadlıq,” BBC və “Amerikanın səsi” radiolarının milli tezliklərdə yayımına icazə verməyə çağırıblar.