Bu gün (30 may) “Ayna”-“Zerkalo” qəzetlərinin, habelə RATİ-nin əməkdaşı İdrak Abbasov Daxili İşlər Nazirliyinə çağırılıb.
Saat 11-dən 14-ə qədər ifadə verən İ.Abbasovun səhhəti pisləşdiyi üçün ifadənin alınması təxirə salınıb. Bu barədə RATİ-yə İ.Abbasovun özü məlumat verib.
İ.Abbasovun sözlərinə görə, ondan ifadə daxili işlər naziri Ramil Usubovun nəzarəti altında fəaliyyət göstərən xüsusi qrupun təmsilçisi, polis polkovnik leytenantı Tofiq Nəbibəyli və adını bilmədiyi polis kapitanı tərəfindən alınırmış.
Xatırladaq İ.Abbasov aprelin 18-də Binəqədi rayon Sulutəpə qəsəbəsində ARDNŞ-nin apardığı növbəti söküntü işlərini lentə alarkən adı çəkilən neft şirkətinin təhlükəsizlik idarəsinin əməkdaşları tərəfindən qəddarlıqla döyülüb.