GƏNC FƏAL 13 GÜNDÜR Kİ QANUNSUZ HƏBDƏ SAXLANILIR

aprel 18th, 2011
AXCP Gənclər təşkilatının üzvü, gənc blogger Cabbar Savalanlı qanunsuz olaraq həbsdə saxlanılır. Bu barədə RATİ-yə onun  vəkili Anar Qasımov məlumat verib. Vəkil bildirib ki, aprelin 5-də onun haqında seçilmiş həbsqətimkan tədbirinin müddəti bitib və bu müddət məhkəmə tərəfindən artırılmırsa gənc fəal azad edilməlidir.

Vəkil Anar Qasımov bu barədə  Penitensiar Xidmətin rəisi, ədliyyə general-mayoru Mədət Quliyevə müraciət ünvanlayıb. Müraciətdə gənc fəalın fevralın  5-də qanunsuz narkotik ittihamı ilə həbs edilməsini və aprel ayının 5-də  haqqında seçilmiş həbs qətimkan tədbirinin   müddətinin bitməsinə baxmayaraq, onun hələ də həbsxanada saxlanılmasının qanuna zidd bir hal olduğunu qeyd edib.

          Xatırladaq ki,  Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.