Aprelin 14-də Səbail rayon Məhkəməsində hakim Elnur Həsənovun sədrliyi ilə “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru, məhbus jurnalist Eynulla Fətullayevin Azərbaycan Respublikasının baş prokuroru Zakir Qaralova qarşı “Təqsirsizlik prezumpsiyası hüququ”nun pozulmasına dair ondan üzür istənilməsi tələbinə dair məhkəmə hazırlıq iclası keçirilib.
Qeyd edək ki, həm Avropa İnsan Hüquları Məhkəməsinin, həm də Ali Məhkəmə Plenumunun qanuni qüvvəyə minmiş qərarları ilə müəyyən edilib ki, Eynulla Fətullayev barəsində qondarma terrorçuluq ittihamı ilə istintaq aparıldığı dövrdə baş prokuror Zakir Qaralov mətbuata verdiyi açıqlamasında jurnalistin təqsirsizlik prezumpsiyası hüququmu pozaraq, onun barəsində ictimai rəydə əvvəlcədən təqsirli olmağına dair mütləq fikir yaradıb. Eynulla Fətullayev baş prokurorun səsləndirdiyi ifadəni istintaqın gedişinə prosessual nəzarəti həyata keçirən Respublika Prokurorluğunun mövqeyinin ifadəsi kimi dəyərləndirərək, bunu təqsirsizlik prezumpsiyası hüququnun pozulması kimi qiymətləndirmişdir.
Xatırladaq ki, Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib. Hazırda isə jurnalist saxta narkotik ittihamı ilə həbsdə saxlanılır.