Reportyorların Azadlıq və Təhlükəsizlik İnstitutu (RATİ) və Media Hüququ İnstitutu (MHİ) xarici radiostansiyaların Azərbaycanın yerli FM tezliyində yayılmasının qadağan olunması ilə bağlı qərarın dəyişməyəcəyi və bu radioların yayımının qeyri-mümkün olması ilə bağlı hökumətin açıqlamalarını qətiyyətlə pisləyir.
RATİ və MHİ bu açıqlamaları ictimai marağa zidd addım kimi qiymətləndirir və Azərbaycan hökumətini təcili qanunvericilikdə dəyişiklik edərək, "Azadlıq", "Amerikanın səsi", BBC radiolarının yayımını bərpa etməyə çağırır.
RATİ və MHİ hökumətin diqqətinə çatdırır ki, BMT-nin İnsan Hüquqları Şurasının İşçi Qrupunun Azərbaycan üzrə hesabatında da bu məsələ ilə bağlı tövsiyələr verilib. Sözügedən sənədin 15 saylı bəndində ifadə azadlığının və növündən asılı olmayaraq həm milli, həm də xarici müstəqil informasiya vasitələrinin (mətbuat, internet, radio yaxud televiziya) azadlığının tam şəkildə həyata keçirilməsini təmin etmək tövsiyə olunur. 17-ci bənddə isə media azadlıqlarını, xüsusilə yayımdan istifadə imkanlarını genişləndirmək, xarici FM radiostansiyalarının yayımının qadağan edilməsinin qarşısının alınması ilə bağlı ATƏT-in tövsiyələrini icra etmək; beynəlxalq radiostansiyaların lisenziyalarının yenilənməsini təmin etmək üçün Televiziya və Radio Yayımı haqqında Qanuna mümkün qədər tez düzəliş etmək; radiolarla bağlı qərarını bir daha nəzərdən keçirmək və FM tezliklərində xarici radiostansiyaların yayımına icazə vermək də tövsiyə olunub.
RATİ və MHİ hökuməti bu tövsiyələrə əməl etməyə, televiziya və radio yayımı üçün yararlı olan çoxlaylı tezliklərin istifadəsiz saxlanması təcrübəsinə son qoymağa, yeni radio və televiziya kanallarının yaranmasına əngəlləri, bu sahəyə investisiyaların, o cümlədən xarici investisiyaların, bilik və texnologiyaların gəlməsinə yaradılan hüquqi və inzibati maneələri aradan qaldırmağa, xarici radiostansiyaların FM tezliklərində yayımını bərpa etməyə çağırır.