Reportyorların Azadlıq və Təhlükəsizlik İnstitutu (RATİ) www.eqreb.com satirik saytına girişin bloklaşdırılmasını pisləyir və bunu hökumətin internet üzərində qeyri formal senzurası kimi qiymətləndirir.
Qeyd edək ki, oktyabrın 8-dən www.eqreb.com satirik saytına adi qaydada girmək bloklaşdırılıb. Sayta proksi saytların xidmətindən istifadə edərək girmək mümkündür. Bu isə qadağanın Azərbaycan sərhədləri daxilində tətbiq olunduğunu praktiki sübut edir. RATİ hesab edir ki, www.eqreb.com saytına qadağanın tətbiqi təsadüfi deyil. Bu zamana qədər də Azərbaycanda hakimiyyəti sərt tənqid edən www.tinsohbeti.com, www.susmayaq.biz saytları da oxşar aqibətlə üzləşiblər. Son nəticədə bu saytlar fəaliyyətlərini dayandırmağa məcbur olublar. Habelə zaman-zaman Azərbaycanda müxtəlif tənqidçi qəzetlərin internet səhifələri haker hücumlarına məruz qalıb və ya Naxçıvan Muxtar Respublikasında da insan hüquqları mövzusunu işıqlandıran saytlara girişi bloklaşdırıb. RATİ , Azərbaycan hökumətini www.eqreb.com saytının bloklaşdırılmasına son qoymağa, KİV və ümumilikdə internet üzərində istənilən formada senzura tətbiqini dərhal dayandırmağa çağırır.