Reportyorların Azadlıq və Təhlükəsizlik İnstitutu (RATİ) “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevin atasına hədələyici zəngin edilməsini qınayır və bunu jurnalistə qarşı “mənəvi terror” kimi qiymətləndirir.
Jurnalistin atası Emin Fətullayevin verdiyi məlumata görə, dünən (10 aprel) saat 06.40 radələrində onun ev telefonuna zəng gəlib, rus dilində danışan qadın özünü Ədliyyə Nazirliyinin işçisi kimi təqdim edərək, Eynulla Fətullayevin öldürüldüyü barədə yalan məlumat verib və yaxın günlərdə jurnalistin valideynlərinin də öldürüləcəyini bildirib. Emin Fətullayev bu barədə polisə zəng edərək məlumat verib.
RATİ bəyan edir ki, bu cür hədələyici zənglər birbaşa olaraq Eynulla Fətullayevə qarşı yönəlib və onu təzyiq altında saxlamağa cəhddir. Bundan əlavə, zəng edən şəxsin yalandan özünü Ədliyyə Nazirliyinin nümayəndəsi kimi təqdim etməsi bu zəngin təxribat xarakterli olmasını göstərir.
RATİ Azərbaycanın hüquq-mühafizə orqanlarını bu məsələni dərhal araşdırmağa və təqsirkar şəxsləri cəzalandırmağa çağırır. RATİ Azərbaycan hakimiyyətini Fətullayevi dərhal azad etməyə və bununla da söz azadlığı sahəsində üzərinə götürdüyü öhdəliklərə riayət etməyə çağırır. RATİ beynəlxalq ictimaiyyəti də Fətullayevin azadlığa buraxılması üçün səylərini artırmağa çağırır.