Gənc fəal, AXCP Gənclər Komitəsinin üzvü Cabbar Savalanlıya qarşı başlamış cinayət işinin istintaqı bu gün yekunlaşmalı idi. Amma müdafiə tərəfinin işini tələm-tələsik başa vurulmamağına dair Sumqayıt şəhər Polis İdarəsinin müstəntiqi Ziyadxan Əliyev qarşısında qaldırdığı vəsatət təmin edilib və istintaq müddəti qeyri müəyyən vaxta artırılıb. Bu barədə martın 18-də “Mediaforum” xəbər saytına gənc fəalın vəkili Anar Qasımov məlumat verib.
Anar Qasımov bildirdi ki, Sumqayıt Şəhər Məhkəməsinə müstəntiq Ziyadxan Əliyevin hərəkətlərindən, eləcə də Cabbar Savalanlının narkoloji ekspertizadan təkrar keçirilməsindən imtina olunmağına görə şikayət verilib və məhkəmə martın 28-də, hakim Təhminə Xəlilovanın sədrliyi ilə keçiriləcək. Yalnız bu məhkəmə proseslərindən sonra ibtidai istintaqa yekun vura bilər.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.