“Azadlıq” qəzetinin əməkdaşı Aqil Xəlil dünən (14 may) axşam saatlarında yenidən istintaqa ifadə verib.
Jurnalistin özünün RATİ-yə verdiyi məlumata görə dindirilmə zamanı müstəntiq Əli Quliyev ona yalnız mayın 7-də “28 may” metro stansiyasında ona qarşı baş vermiş məlum hadisə ilə bağlı suallar verib. Bundan əlavə jurnalistə bir nəfərin adını çəkiblər və ondan həmin şəxsi tanıyıb tanımadığını soruşublar. Xəlil istintaqa belə bir adamı tanımadığını bildirib.
Müstəntiq Ə. Quliyev A. Xəlilə imzalamaq üçün sənəd təqdim edib, Xəlil bu sənədi imzalamaqdan imtina edib: ”Sənəddə istintaq zamanı mənə ölkəni tərk etməyin qadağan edilməsi ilə bağlı bənd olduğundan bunu imzalamaqdan imtina etdim.”