Gənclər Media Mərkəzi “gənclər nə istəyir?” prinsipi ilə fəaliyyət göstərəcək. Mərkəzin fəaliyyətə başlaması ölkədə vətəndaş jurnalistikasının inkişafına müsbət təsir edəcək. Burada təcrübə keçib formalaşan gənclər sonra peşəkar media qurumlarında fəaliyyət göstərə biləcəklər.
Mərkəz müasir texniki avadanlıqlarla təchiz edilib. Bura “gənclər üçün ictimai fəaliyyət və formalaşma məkanı” olacaq.
Gənclər efir mədəniyyətinə yiyələnə bilmələri üçün həftədə 2 dəfə yerli və xarici peşəkarlardan ustad dərsləri ala biləcəklər. Mərkəz üzvlərinin fəaliyyətini stimullaşdırmaq üçün müxtəlif müsabiqələrin keçirilməsi nəzərdə tutulur. Layihənin müddəti 6 aydır.
Tədbirdə Azərbaycan Media Mərkəzinin rəhbəri Gülnarə Axundova və İREX təşkilatının nümayəndəsi, media üzrə ekspert Ələsgər Məmmədli çıxış edərək vətəndaş jurnalistikasının məhz gənclərin səyi ilə daha da inkişaf edəcəyini qeyd ediblər, mərkəzin fəaliyyətinə uğurlar arzulayıblar.
Daha sonra layihə icraçıları və layihədə iştirak edəcək gənclər Mərkəzin fəaliyyətinə imkan verən texniki avadanlıqlara və hazırlanmış yeni studiyaya baxış keçiriblər.