Polis özbaşınalıqlarından şikayət etdiyi üçün Ruhi Xəstəliklər Dispanserinə yatırılan I qrup gözdən əlil Hüseynov İsmayıl Süleyman oğlu 07 yanvar 2009-cu il tarixdə dispanserdən çıxarılıbmış.
Ruhi Xəstəliklər Dispanserindən çıxarılarkən o, Sədərək rayon Polis Şöbəsinin müavini Dağbəyi Ələkbərova təhvil verilib. Məlumatı RATİ-nin Naxçıvandakı bölgə müxbirinə dispanserin həkimi Allahverdi Bağırov verib.
Qeyd edək ki, İ. Hüseynov Muxtar Respublika Daxili İşlər Nazirliyinin əməkdaşları tərəfindən 5 yanvar 2009-cu il tarixindən dispanserə yatırılmışdı.
Xatırladaq ki, 24 dekabr 2008-ci il tarixində bir qrup gənc əsassız olaraq (http://www.nakhchivan.org.az/content/view/762/28/lang,az/) Sədərək rayon Polis Şöbəsinə aparılaraq səhərə qədər orada saxlanılmışdı. Polis Şöbəsində gənclərə qarşı fiziki, mənəvi və psixoloji təzyiqlər edildiyi üçün onların valideynləri Azərbaycan Respublikası Daxili İşlər Nazirliyinə, Azərbaycan Respublikası prezidentinə şikayət (http://www.irfs.az/component/option,com_datsogallery/Itemid,30/func,detail/catid,175/id,1755/lang,az/) ərizəsi yazıblar. Ərizəçi valideynlərdən olan İ. Həsənovun həyat yoldaşı II qrup əlil Həsənova Xanımzər Abo qızı və oğlu I qrup əlil Həsənov Elvin isə 7 gündür ki, yoxa çıxıb.
Digər ərizəçi valideynlər – Vəliyev İbrahim və həyat yoldaşı Vəliyeva Türkan isə yanvarın 12-də Sədərək rayon Polis Şöbəsinə aparılıb. Hazırda onlar haqqında da heç bir məlumat verilmir.