Millət vəkili Pənah Hüseyn isə həbsdə olan “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin Bakı Apelyasiya Məhkəməsinə verdiyi şikayət ərizəsində E.Hüseynovun qətli ilə bağlı yazdıqlarına toxunub. Millət vəkilinin qeyd etdiyinə görə, həmin ərizədə yüksək vəzifəli adamların adı mərhum jurnalistin qətli ilə əlaqələndirilib. “Düzdür, Milli Təhlükəsizlik Nazirliyi bu məsələyə münasibət bildirib, amma deyilənlərlə bağlı ciddi araşdırma aparmaq vacibdir”, – deyə qeyd edən P.Hüseyn belə hesab edir ki, E.Hüseynovun qatillərinin İnterpol vasitəsilə axtarılması istiqamətində də hər hansı iş görülmür.
Qeyd edək ki, E.Fətullayev martın 1-də verdiyi apellyasiya şikayətində Elmar Hüseynovun qətli ilə bağlı araşdırmaları nəticəsində baş redaktorun qətlinin arxasında MTN zabitlərinin durduğu qənaətinə gəldiyini qeyd edib. O, bu qətli araşdırdığına görə həbs edildiyini vurğulayıb.
Xatırladaq ki, Eynulla Fətullayev 2007-ci ilin aprelin 21-də böhtan və təhqirdə ittiham olunaraq 2 il 6 ay müddətində azadlıqdan məhrum edilib. Sonradan baş redaktor terrorla hədələmə, etnik və dini düşmənçiliyin salınması, vergidən yayınma ittihamları ilə təqsirli bilinib və 2007-ci il oktyabrın 30-da əvvəlki həbs müddəti də daxil olmaqla ümumilikdə, 8 il 6 ay müddətinə azadlıqdan məhrumetmə cəzası verilib. Baş redaktor cəzasını 12 saylı cəzaçəkmə müəssisəsində çəkirdi. 29 dekabr 2009-cu ildə Fətullayevin üzərindən 0,223 qram heroin tapılıb. Eynulla Fətullayev və onun vəkili bu hadisəni yaxın zamanlarda jurnalistin həbsi ilə bağlı öz qərarını verəcək Avropa İnsan Haqları Məhkəməsinin qarşısını almaq məqsədilə əvvəlcədən qurulmuş əməliyyat kimi qiymətləndirir. Qaradağ Rayon Polis İdarəsinin İstintaq Şöbəsində barəsində Cinayət Məcəlləsinin 234.1 (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə cinayət işi açılan Eynulla Fətullayev yanvarın 2-də 2 saylı Bakı İstintaq Təcridxanasına köçürülüb.
Qeyd edək ki, 2005-ci ilin mart ayının 2-də qətlə yetirilmiş “Monitor” jurnalının baş redaktoru Elmar Hüseynovun ölüm faktı ilə bağlı cinayət işi açılsa da, hələ də cinayətin üstü açılmamış, qətlin sifarişçiləri və icraçıları tapılmamışdır.