“Xural” qəzetinin həbsdə olan baş redaktoru Əvəz Zeynallının işindən Ali Məhkəməyə şikayət göndərilib. Bu barədə bu gün (05 iyul) Reportyorların Azadlıq və Təhlükəsizlik İnstitutuna (RATİ) Zeynallının vəkili Elçin Sadıqov məlumat verib. Vəkil Elçin Sadıqovun sözlərinə görə, şikayətdə Ali Məhkəmədən cinayət işinə bəraətverici əsaslarla xitam verilməsi yer alıb.
“Şikayət Ali Məhkəməyə iyulun 3-də göndərilib. Əvəz bəyin saxlanma şəraitindən heç bir şikayəti yoxdur. Yeganə narazılığı onun saxta ittihamlarla həbs olunmasıdır. Ailəsi ilə keçən ay görüşüb. Bu ay isə hələ görüş verilməyib. Mən özüm də sabah onunla görüşmək üçün 10 saylı Cəzaçəkmə Müəssisəsinə gedəcəyəm” –deyə vəkil bildirib.
Xatırladaq ki, Əvəz Zeynallı Milli Məclisin sabiq deputatı Gülər Əhmədovanın şikayəti ilə 2011-ci il oktyabrın 28-də həbs edilib. Korrupsiyaya Qarşı Mübarizə İdarəsində baş redaktor barəsində Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb. Daha sonra isə ona qarşı Cinayət Məcəlləsinin 306-cı (məhkəmə qərarlarını icra etməmə) və 213.1-ci (vergidən yayınma) maddələri ilə ittiham irəli sürülüb. 13 fevral 2013-cü ildə dövlət ittihamçısı Əvəz Zeynallının 11 il müddətinə həbs olunmasını istəyib. Martın 12-də Bakı Ağır Cinayətlər Məhkəməsi jurnalistin 9 il müddətinə azadlıqdan məhrum edilməsi barədə hökm çıxarıb. 13 may 2013-cü ildə apellyasiya məhkəməsi də bu hökmü qüvvədə saxlayıb. 14 may 2013-cü il tarixdə Əvəz Zeynallı 10 saylı Cəzaçəkmə Müəssisəsinə köçürülüb.
Bir çox beynəlxalq və yerli hüquq müdafiə təşkilatları bu ittihamları saxta hesab edir və Əvəz Zeynallının hakimiyyətə qarşı tənqidi yazılarına görə həbs olunduğunu bəyan edirlər.