Yanvarın 2-də İsrailin Bakıdakı səfirliyi qarşısında Qəzza hadisələri ilə bağlı dindarlar tərəfindən keçirilən aksiyada “Bizim Azərbaycan” qəzetinin müxbiri Ramin Bayramov Yasamal rayon Polis İdarəsinin 27-ci Polis Bölməsinin əməkdaşları tərəfindən saxlanılıb.
R. Bayramov saxlanılan digər aksiya iştirakçıları ilə birlikdə Bakı Baş Polisi İdarəsinin müvəqqəti inzibati saxlanma mərkəzinə aparılıb. Bu barədə RATİ-yə bu gün (06 yanvar) R.Bayramovun özü məlumat verib.
“Polis aksiya iştirakçıları ilə birlikdə məni də saxladı. Bu zaman jurnalist vəsiqəmi təqdim etsəm də, mülkü geyimdə olan bir şəxs "bunu da aparın və orda araşdırın" – deyərək, polislərə göstəriş verdi. Xətai rayon ərazisində yerləşən müvəqqəti inzibati saxlanma mərkəzində də dəfələrlə jurnalistliyimi təsdiq edən sənədi təqdim etsəm də məni 7 saat orada saxladılar”, – deyə R. Bayramov qeyd etdi.
Daxili İşlər Nazirliyinin İctimaiyyətlə Əlaqələr İdarəsinin əməkdaşı Ehsan Zahidov isə RATİ əməkdaşı ilə telefon söhbətində onlara bu barədə məlumatın daxil olmadığını bildirdi.