Obyektiv online televiziyasının əməkdaşı Fərqanə Novruzova hakimin etirazı əsasında jurnalist Nicat Əliyevin 16 may tarixində Bakı Ağır Cinayətlər Məhkəməsində keçirilən məhkəmə prosesinə buraxılmayıb. Bu barədə Reportyorların Azadlıq və Təhlükəsizlik İnstitutuna (RATİ) jurnalistin özü məlumat verib.
Obyektiv TV-nin jurnalistinin sözlərinə görə, məhkəmə zalına daxil olmaq istəyərkən məhkəmə nəzarətçisi digər şəxsləri məhkəmə zalına buraxsa da onu prosesə buraxmayıb.
Novruzova jurnalist olduğu üçün prosesdə iştirakına icazə verilməli olduğunu məhkəmə işçilərinə bildirib. “Mən bu gün məhkəməyə Obyektiv TV-nin 12 aprel 2013-cü ildən bəri işıqlandırdığı prosesi çəkmək üçün getmişdim. Mən öz jurnalist fəaliyyətimi yerinə yetirirdim. Nəzarətçiyə bildirdim ki, o mənim peşə fəaliyyətimi yerinə yetirməyimə mane olur. Ancaq o cavabında mənə bildirdi ki, bu hakimin göstərişidir” deyə Novruzova bildirib.
Novruzovanın həm məhkəmə nəzarətçisi, həm də jurnalistin vəkili Anar Qasımlıdan aldığı məlumata görə, hakim ona qarşı belə münasibətinin səbəbi onun Obyektiv TV əmkəkdaşı olması olub. Hakimin “onlar (Obyektiv TV) məhkəmə prosesini çəkib YouTube-yə yükləyirlər” dediyi bildirilir.