Yanvarın 24-də İsmayıllıda baş vermiş hadisələrdə “musavat.com” saytının telereporyoru Araz Bayramov polis təzyiqi ilə üzləşib. Bu barədə Reportyorların Azadlıq və Təhlükəsizlik İnstitutuna məlumat verən jurnalistin sözlərinə görə axşam saat 20 radələrində çəkiliş aparan zaman polis tərəfindən saxlanılıb. “Polisin vətəndaşlara güc tətbiq etməsini çəkərkən, əynimdə “press” yazılı jıet olmasına baxmayaraq, bir zabit məni saxlayaraq polis şöbəsinə apardı. İşə yeni düzəldiyim üçün vəsiqəm yox idi. Saxlandığım 1 saat ərzində polislər redaksiya ilə əlaqə saxlayaraq, orada işlədiyimi dəqiqləşdirdilər və məni sərbəst buraxdılar. Bundan sonra da hadisələri çəkərkən polis yenidən məni saxlayaraq şöbəyə apardı və yolda mənə sillə vurdu” – deyən Araz Bayramov bildirib ki, 20 dəqiqə saxlandıqdan sonra polis rəisi Nizami Qocayevin göstərişi ilə onu sərbəst buraxıblar.
Qeyd edək ki, polisin etirazçılara qarşı istifadə etdiyi gözyaşardıcı qaz nəticəsində hadisələri işıqlandırmaq üçün orada olan digər jurnalistlərin səhhətində də problem yaradıb.