Müstəqil jurnalist kimi fəaliyyət göstərən Vüqar Qurdqanlı dünən (03 iyul) Məhkəmə Qərarlarının İcrası İdarəsinin Binəqədi Rayon Şöbəsinə çağırılıb.
RATİ-nin əməkdaşı ilə söhbətində Qurdqanlı bu cür münasibəti başa düşmədiyini və öz mövqeyində israrlı olduğunu qeyd etdi. “Mən jurnalistəm və ancaq yazılar yazıram. Başqa işdə işləmək fikrim yoxdur. Əgər bu cür münasibət davam edəcəksə məsələ ilə əlaqədar mətbuat konfransı keçirməyi və bunu ictimaiyyətin diqqətinə çatdırmağı planlaşdırıram”, – deyə Qurdqanlı vurğuladı.
Xatırladaq ki, Qurdqanlı “Xural” qəzetində yazdığı məqalələrə görə Yevlax Şəhər İcra Başçısı Elmar Vəliyev tərəfindən məhkəməyə verilmişdi. Nərimanov Rayon Məhkəməsində Vüqar Qurdqanlının 1 il 6 ay müddətinə aylıq əmək haqqının 20%-i məbləğində islah işlərinə məhkum edilməsi ilə bağlı qərar çıxarılmışdı. Qərar Apellyasiya Məhkəməsi tərəfindən də qüvvədə saxlanılıb.
*Cinayət Məcəlləsinin 49-cu maddəsinə əsasən islah işləri iki aydan iki ilədək müddətə məhkum olunmuş şəxsin qazancından dövlət nəfinə beş faizdən iyirmi faizədək pulun tutulmasını nəzərdə tutur.