Bu gün (04 iyul) saat 12.00 radələrində “Dalğa” Gənclər Hərəkatının bir qrup üzvünün ATƏT-in Bakı ofisinin qarşısında keçirmək istədiyi aksiyanın qarşısı polis tərəfindən alınıb.
Belə ki, Azərbaycanda insan haqlarının pozulmasını, xüsusilə də mətbuat azadlığının məhdudlaşdırılmasını beynəlxalq ictimaiyyətin diqqətinə çəkmək, reallıqlarla bağlı beynəlxalq qurumları adekvat reaksiya verməyə çağırmaq istəyən gəncləri ATƏT-in Bakı ofisinin qarşısında polis qarşılayıb. Polislər “Dalğa” Gənclər Hərəkatının sədri Vəfa Cəfərova və daha bir neçə aksiya iştirakçısını saxlayaraq Səbayel rayon Polis İdarəsinin 39-cu Polis Bölməsinə aparıblar.
Habelə polis aksiya yerində monitorinq aparan Reportyorların Azadlıq və Təhlükəsizlik İnstitutunun (RATİ) əməkdaşları – Mehman Hüseynov və Elmira Osmanovanı, eləcə də “Azadlıq və Azad Avropa radiosu”-nun əməkdaşı Durna Səfərlini də saxlayaraq bölməyə aparıb. Jurnalistlərin vəsiqələrinə və onların iş başında olmasına əhəmiyyət verməyən polis RATİ əməkdaşı M. Hüseynova qarşı fiziki zor tətbiq etməkdən də çəkinməyib. Vəzifə borcunu icra etməklə məşğul olduğunu polislərə izah edən M.Hüseynovun qolunu buraraq onun zorla polis maşınına oturdublar.
Amma maraqlıdır ki, bölmədə jurnalistlərin vəsiqələri yoxlanıldıqdan sonra onlar azad edilib. Halbuki hadisə yerində işləyən jurnalistlərin vəsiqələri yaxalarında olub. Hətta 39-cu Polis Bölməsindən bildirilib ki, onlar yalnız “Dalğa”nın 7 üzvünü saxlayıblar, digər üç nəfər, yəni jurnalistlər özləri Polis Bölməsinə giriblər?!.
“Dalğa”-nın üzvləri 3 saatdan artıq polis bölməsində saxlandıqdan sonra onlardan 4-ü sərbəst buraxılmış, 3-ü isə Səbayel Rayon Məhkəməsinə aparılıb. Məhkəmədə onlara xəbərdarlıq edildikdən sonra həmin üç nəfər də sərbəst buraxılıb.