Noyabrın 19- da Yasamal rayon Məhkəməsində hakim Abbas Rzayevin sədrliyi ilə vətəndaş Şirinova Solmaz Qədimalı qızının vətəndaş Hüseynov Zakir Qəni oğluna qarşı xüsusi ittiham qaydasında şikayətinə əsasən məhkəmə prosesi keçirilib. Prosesdə xüsusi ittihamçı Şirinova Solmaz və cavabdeh Hüseynov Zakir iştirak ediblər.
Məhkəmədə şahid qismində ifadə verən sözügedən məqalələrin müəllifi, “Yeni Müsavat” qəzetinin müxbiri Elşən Qədimov (Balaxanlı) bildirib ki, Hüseynov Zakir redaksiyaya şikayət məktubu yazaraq, atası Qəni Hüseynovla ailəli olmuş Şirinova Solmazın atasının ölümündən sonra onun mülkiyyətində olan bağ evindən qanunsuz olaraq istifadə etməsini bildirib
“Bir jurnalist kimi redaksiyamıza daxil olan hər hansı ərizəyə əsasən məlumat hazırlayanda, qarşı tərəfin də mövqeyini öyrənirəm. Mən bununla əlaqədar Solmaz xanıma dəfələrlə zəng etsəm də, o müxtəlif bəhanələr gətirərək, redaksiyaya gəlməkdən boyun qaçırıb. Mən də ərizəçinin redaksiya təqdim etdiyi sənədlərin əsasında o məqalələri yazmışam”, – deyə Elşən Qədimov qeyd edib.
Hakim Abbas Rzayev tərəflərin çıxışa hazırlaşması və qərarı elan etmək üçün prosesi 6 dekabr saat 09:30-a təyin edib.
Xatırladaq ki, vətəndaş Şirinova Solmaz vətəndaş Hüseynov Zakirin şikayət ərizəsinə əsasən “Yeni Müsavat” qəzetinin 18. 03. 2010-cu il tarixli sayında dərc olunmuş yazılarda “Həkim Qəninin mülkiyyəti uğrunda dava”, 21. 01. 2009-cu il tarixli sayında “Apellyasiya Məhkəməsinin hakimi qazı rolunda” və “İnter plus” qəzetinin 16-20 aprel 2009-cu il tarixli saylarında “Apellyasiya Məhkəməsi də şəriət qanunlarına “hə” dedi” və s. məqalələrdə şərəf və ləyaqətinin alçaldıldığını və haqqında təhqiramiz ifadələrin işlədildiyini bildirərək, Yasamal rayon Məhkəməsinə müraciət edərək, onun CM-nin 147 və 148-ci maddələrinə əsasən cəzalandırılmasını istəmişdir.