Aprelin 1-də İsmayıllı hadisələrinə görə həbs olunan “Yeni Müsavat” qəzetinin köşə yazarı Tofiq Yaqublunun işindən Şəki Apellyasiya Məhkəməsinə şikayət verilib. Bu barədə bu gün (4 aprel) Reportyorların Azadlıq və Təhlükəsizlik İnstitutuna(RATİ) jurnalistin vəkili Nemət Kərimli məlumat verib.
Vəkil bildirib ki, apellyasiya şikayətində jurnalistə bəraət istənilib.
“Biz İnsan Hüquq və Əsas Azadlıqlarının Müdafiəsi Haqqında Avropa Konvesiyasının 5 (azadlıq hüququ), 6 (ədalətli məhkəmə araşdırması) və 14-cü (ayrı-seçkiliyin qadağan edilməsi) maddələrinin pozuntusunu qeyd etmişik və 200 min manat məbləğində kompensasiya ödənilməsini istəmişik. Onu da qeyd edim ki, mən məhkəmə protokolunun bir qismi ilə tanış olmuşam və buna əsasən deyə bilərəm ki, hökmdə səhvlik var. Çünki müvəkkilimin xeyrinə olan bəzi məqamlar protokola düşməsinə baxmayaraq hökmdə öz əksini tapmayıb. Eyni zamanda müdafiə etdiyim şəxsin xeyrinə olan bəzi sübutlar, o cümlədən ifadələr hökmə salınmayıb və bununla da işin mahiyyəti yalnış istiqamətə yönləndirilib”,-deyə vəkil qeyd edib.
Xatırladaq ki, yanvarın 24-də İsmayıllı rayonuna səfəri zamanı sakinlər arasında polisə müqavimət göstərmək, heç kimə tabe olmamaq, nəqliyyat vasitələrinin yolunu bağlamağa çağırışlar etməkdə təqsirləndirilən Tofiq Yaqubluya qarşı Cinayət məcəlləsinin 233-cü və 315-ci maddələri ilə ittiham irəli sürülüb. Aprelin 27-də isə T. Yaqubluya qarşı qarşı Cinayət Məcəlləsinin 233-cü maddəsi üzrə ittihama xitam verilib və 220.1-ci (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) maddə ilə ittiham irəli sürülüb. 17 mart 2014-cü il tarixində Şəki Ağır Cinayətlər Məhkəməsi Tofiq Yaqublunun 5 il müddətinə azadlıqdan məhrum edilməsi barədə hökm çıxarıb.