Bu gün Nəsimi rayon məhkəməsinin hakini Məmməd Məmmədovun sədrliyi ilə "Bizim Yol" qəzetinin müxbiri Natiq Ədilovun Tələbə Qəbulu Üzrə Dövlət Komisiyasının sədri Məleykə Abbaszadənin hərəkətsizliyindən şikayətlənərək ona qarşı qaldırdığı iddia əsasında məhkəmə hazırlıq iclası keçirilib.
Məhkəmədə hakim tərəflərə hüquq və vəzifələrini açıqladıqdan sonra iddiaçı N. Ədilov vəsatət qaldırdı ki, məhkəmənin ona göndərdiyi məktubun vaxtında ona çatmamağının səbəbi aydınlaşdırılsın. Daha sonra cavabdehin nümayəndəsi hüquq məsləhətçisi Nərminə Bayramova öz çıxışında sorğuya cavab göndərdikləri üçün iddianı əsassız saydıqlarını bildirdi. Daha sonra nümayəndə sorğuya göndərdikləri cavab məktubunu məhkəməyə təqdim etdi. Qeyd edək ki, təqdim olunan cavab məktubunda nə poçtun möhürü, nə də ünvan qeyd olunmuşdur. İddiaçı məhkəmədən bütün bunları nəzərə almağı xahiş etdi. Növbəti məhkəmə prosesi 30 mart saat 10:00-a təyin edildi.
Xatırladaq ki, jurnalist 29 noyabr 2007-ci il tarixində TQDK ya populyar müğənni Röyalə Nəcəfovanın (Röya Ayxanın) Bakı Dövlət Universitetinə hansı yolla daxil olması barədə sorğu göndərib, lakin həmin sorğu cavablandırılmamışdır. İddia ərizəsində xahiş edilir ki, məhkəmə Məleykə Abbaszadənin 30 noyabr 2007-ci il tarixli informasiya sorğusunda göstərilən sualları ətraflı və doğru-dürüst cavablandırmağa məcbur edən qətnamə qəbul edilsin və Mülki Prossesual Məcəllənin 265.1-ci maddəsinə uyğun olaraq müvafiq qanunvericiliyin tələblərini kobud şəkildə pozan şəxs barəsində xüsusi qərardad çıxarasın.