İTV-NİN QARŞISINDAKI AKSİYANIN DAĞIDILMASINDA JURNALİSTLƏR TƏZYİQLƏ ÜZLƏŞİBLƏR

may 25th, 2012
 Mayın 24-də İctimai Palata İctimai Televiziyanın (İTV) qarşısında keçirdiyi piket zamanı polis və mülki geyimli şəxslər jurnalistlərin peşə fəaliyyətini yerinə yetirməsinə maneçilik yaradıblar. Belə ki, İctimai Palata fəalları telekanalın binasına doğru irəliləyərkən mülki və polis geyimli şəxslər tərəfindən ciddi zorakılığa məruz qalıblar.

Aksiya iştirakçıları ilə kobud davranılıb, onlar zor gücünə polis maşınlarına və əraziyə gətirilən avtobuslara mindiriliblər.
Bu zaman da peşə fəaliyyətini yerinə yetirən “Gündəlik Teleqraf” qəzetinin fotoqrafı Bayram İsgəndərli polislər tərəfindən saxlanılıb, daha sonra sərbəst buraxılıb. Habelə aksiya zamanı “Turan” informasiya agentliyinin əməkdaşı Etimad Budaqov, eləcə də  “Obyektiv TV”-nin əməkdaşlarının və digər media qurumlarının peşə fəaliyyətinə maneələr yaradılıb.  Hadisələri izləyənlər arasında  beynəlxalq media qurumların təmsilçiləri də olub. Aksiyanı xarici jurnalistlər də videolentə alıblar. İTV əməkdaşları teleşirkətin binasından kənara çıxmadan çəkiliş aparıblar.   
    Qeyd edək ki, piket İTV-nin siyasi plüralizmi, ifadə azadlığını pozmasına etiraz olaraq keçirilib. Müxalifət hesab edir ki, “Eurovision”un təşkilatçılarından biri olan İTV Avropa Yayım Birliyinin ifadə azadlığı haqqında prinsiplərini pozur, Avropa Şurası qarşısında götürdüyü öhdəliklərə uyğun fəaliyyət göstərmir. Piketin əsas tələblərindən biri İctimai Teleradioda müxalif düşərgəyə efir vaxtı ayrılması olub.