“Bizim Yol” qəzetinin əməkdaşı Ramid İbrahimovun "Qış bulvar"ında döyülməsi ilə bağlı olaraq Nəsimi Rayon Məhkəməsində hakim Emin Mehdiyevin sədrliyi ilə jurnalistin və onun nümayəndəsinin iştirakı olmadan qərar çıxarılıb. Bu barədə bu gün (12 aprel) Reportyorların Azadlıq və Təhlükəsizlik İnstitutuna (RATİ) R. İbrahimov məlumat verib.
“Qərarın nə vaxt çıxarılmasından xəbərsizəm. Nəsimi Rayon Məhkəməsinin hakimi Emin Mehdiyevin köməkçisi Araz Həsənovla telefon əlaqəsi saxlayıb məhkəmənin nə vaxt olacağını soruşdum. O, bildirdi ki, məhkəmə olub, qərar da var, amma, qərarda nələr yazıldığından xəbərsiz olduğunu söylədi” – deyə jurnalist bildirdi.
Xatırladaq ki, “Bizim Yol” qəzetinin əməkdaşı Ramid İbrahimov 26 noyabr 2010-cu ildə “Qış parkı” layihəsi əsasında Bakı şəhəri, Əlimərdan bəy Topçubaşov küçəsi 73 ünvanında evlərin sökülməsi ilə əlaqədar foto çəkiliş apararkən, BŞİH –nin əməkdaşı tərəfindən fiziki təzyiqə məruz qalıb və bununla əlaqədar dekabrın 3-də Media Hüququ İnstitutu (MHİ) Daxili İşlər Nazirliyinə (DİN), Baş prokurorluğa və Mətbuat Şurasına (MŞ) müraciət edib. R. İbrahimov baş verən hadisənin araşdırılması ilə bağlı olaraq, Nəsimi rayon Polis İdarəsinin 21-ci polis bölməsininbaş təhqiqatçısı polis kapitanı Yaşar İsayevə müraciət etmişdi, lakin jurnalist Y. İsayevin 06 yanvar 2011-ci il tarixdə cinayət təqibinin başlanmasının rədd olunması qərarından Nəsimi Rayon Məhkəməsinin şikayət etmişdi
Qeyd edək ki, “Bizim yol” qəzeti 2003-cü ildən çap olunur və gündəlik qəzet kimi fəaliyyət göstərir.