Bu gün (15 yanvar) Bakı Apellyasiya Məhkəməsində hakim İlham Əsədovun sədrliyi ilə bir qrup jurnalistin (Elçin Həsənov, Seymur Həziyev, Əbülfəz Qurbanlı və Eltac Pənahov) Ali Məhkəməyə kassasiya şikayəti ilə müraciət etmələri üçün dövlət hesabına vəkillə təmin edilmələrinə görə verdikləri iddia üzrə məhkəmə prosesi keçirilib.
Hakim jurnalistlərin iddiasını rədd edib. Bu barədə məlumatı Reportyorların Azadlıq və Təhlükəsizlik İnstitutuna (RATİ) Elçin Həsənov verib.
Qeyd edək ki, adı çəkilən jurnalistlər 2008-ci ilin sentyabr ayında Səbail rayon Polis İdarəsinin 39-cu Polis Bölməsinə informasiya sorğusu ilə müraciət ediblər. Sorğuları cavablandırılmadığı üçün jurnalistlər “informasiya sorğusuna cavab verilməsindən imtina edilməsinin qanunsuz hesab edilməsi” tələbi ilə Səbail rayon Məhkəməsinə müraciət etmişdilər. Bu məhkəmə tərəfindən iddiaları təmin olunmayan jurnalistlər daha sonra Apellyasiya Məhkəməsinə müraciət etmişdilər. Amma onların apellyasiya şikayəti də rədd edilmişdi. Hazırda isə jurnalistlər kassasiya şikayəti vermək istəyirlər və kassasiya şikayətlərinin müdafiə edilməsinə görə dövlət hesabına vəkillə təmin olunmaları üçün Apellyasiya Məhkəməsi qarşısında iddia qaldırmışdılar.