Həbsdə olan jurnalist Eynulla Fətullayevə dəstək üçün oktyabrın 20-də başlayan aclıq aksiyası davam edir. Aksiya Musavat Partiyasının qərargahında davam etdirilir.
Aclıq Aksiyasına jurnalistlər Şahvələd Çobanoğlu, Qan Turalı (köşə yazarı) və Elçin Həsənov (“Yüksəliş naminə” qəzetinin əməkdaşı) qoşulub.
Bu gün Musavat partiyasının qərargahında aclıq aksiyasını davam etdirən jurnalistlərin səhhətində problem yaranıb və bununla bağlı təcili tibbi yardıma müraciət edilib. Təcili tibbi yardım həkimləri bildiriblər ki, jurnalist Şahvələd Çobanoğlunun təzyiqi yüksəkdir, Elçin Həsənovun isə təzyiqi çox aşağı düşüb. Qan Turalının isə səhhəti normaldır. Təcili tibbi yardım həkimi jurnalistlərə vitamin c və ya qlükoza məhlulu vurmağı təklif edib, lakin jurnalistlər buna razı olmayıblar. Artıq jurnalistlər iki gündür ki , aclıq aksiyası edirlər.
Qeyd edək ki, jurnalist Eynulla Fətullayev 3 gündür aclıq aksiyasına başlayıb.