APA-nın verdiyi xəbərə görə, səfər zamanı hüquq müdafiəçiləri Azərbaycan üzrə həmməruzəçilər Andres Herkel və Yevgeniya Jivkova, İnsan Haqları üzrə Komissar Tomas Hammerberq, Venesia Komissiyasının katibi Canni Bukikkio, “Aqo” Monitorinq Qrupunun üzvləri ilə görüşüblər. Tədbirdə çıxış edən N. Cəfəroğlu bildirib ki, görüşlərdə bir sıra məsələlərlə yanaşı söz azadlığının durumu və həbs olunmuş jurnalistlərlə bağlı müzakirələr də aparılıb.
Hüquq müdafiəçisi Səidə Qocamanlı AŞPA -nın Ermənistanla bağlı qəbul etdiyi qətnaməyə toxunaraq bildirib ki, bu qətnamə Azərbaycan üçün mesajdır: ”Azərbaycan iyun sessiyasına qədər mövcud problemlərin həlli istiqamətində addımlar atmalıdır. O vaxta kimi xəstə məhbuslar və həbsdə olan jurnalistlər azadlığa buraxılmasa, Azərbaycana siyasi məhbus problemi üzrə məruzəçinin təyin olunması məsələsi gündəmə gələ bilər”, – deyə qeyd edən hüquq müdafiəçisi onu da bildirilib ki, görüşlər zamanı “Azadlıq” qəzetinin əməkdaşı Aqil Xəlillə bağlı müzakirələr də aparılıb.