Bu gün (23 aprel) Yasamal Rayon Məhkəməsində hakimi Raqib Qurbanovun sədrliyi ilə Azərbaycan Nəşriyyatında böyük redaktor vəzifəsində işlədiyini bildirən İlham Sadıqovun iddiası ilə "Azadlıq" qəzeti və qəzetin oxucusu həm də kənar yazarı Elmira Tofiqqızına qarşı başlanmış məhkəmə prosesi davam edib.
Hakim linqvistik ekspertizanın təyin edilməsi üçün məhkəmə iclasının təzələndiyini elan etdi. İddiaçı tərəf buna etiraz etsə də cavabdehin nümayəndəsi vəkil Elçin Sadıqov hakimlə razılaşdı. Daha sonra hakim iddiaçıya iddia tələblərini dəqiqləşdirmək üçün vaxt verdi. E. Sadıqov isə buna öz etirazını bildirdi. “Mülki Prosessual Məcəllənin 14.2 maddəsində göstərilir ki, iddia tələbi dəyişdirilə bilməz. Belə bir hal baş verərsə bu qanun pozuntusudur.”
Daha sonra hakim prosesi 24 aprel saat 09:30 -a qədər təxirə saldı.
Xatırladaq ki, İ. Sadıqov müəllifi olduğu Koroğlu haqqında nəşri tənqid edən məqaləyə görə "Azadlıq" qəzetini və məqalənin müəllifi Elmira Tofiqqızını məhkəməyə verib. İddiaçı məhkəmədən cavabdehlərin həar birinin 20 000 AZN məbləğində cərimələnməsini istəyib.