Bu gün (25 dekabr) Yasamal rayon Məhkəməsində hakim Xəqani Məmmədovun sədrliyi ilə 21 saylı orta məktəbin direktoru Fərrux Ağasıyevin və bu məktəbin direktorunun təlim tərbiyə işləri üzrə müavini Zöhrə Yusubovanın "Gündəlik Bakı" qəzetinə qarşı qaldırdığı iddia əsasında qapalı məhkəmə prosesi keçirilib.
Bu barədə RATİ-yə "Gündəlik Bakı" qəzetinin baş redaktorunun 1-ci müavini Üzeyir Cəfərov məlumat verdi.
Onun sözlərinə görə, məhkəmədə iddiaçı tərəfin nümayəndəsi Bakıxan Yusifov, cavabdeh tərəfdən isə qəzetin təsisçisi və baş redaktoru Habil Vəliyev, Ü. Cəfərovun özü və cavabdeh tərəfin nümayəndəsi Fariz Namazlı iştirak edib. Prosesdə hakim X. Məmmədov tərəflərə barışıq təklif edib.
“İddiaçı tərəfin nümayəndəsi tərəddüd etdi və bu barədə iddiaçı tərəflə məsləhətləşməsinə ehtiyacın olduğunu dedi. Buna görə hakim məhkəmə prosesini 2009-cu ilin yanvar ayının 13-ü saat 16:00-a qədər təxirə saldı”, – deyə U. Cəfərov qeyd etdi.
Qeyd edək ki, iddiaya “Gündəlik Bakı” qəzetinin 07 noyabr 2008-ci il tarixli sayında “5-ci sinif şagirdi zorlandı” başlıqlı məqalə səbəb olub.